Türkiyə və Fransa "Müdafiə sahəsində əməkdaşlıq üzrə yol xəritəsi" imzalamaqla iki ölkə arasında hərbi əlaqələrin genişləndirilməsi və strateji dialoqun gücləndirilməsi üçün yeni çərçivə yaradıb. Sənəd Türkiyə Milli Müdafiə Nazirliyinin yüksək səviyyəli nümayəndə heyətinin Parisdə Fransanın müdafiə və hərbi rəsmiləri ilə görüşündən sonra imzalanıb.
"Anadolu" agentliyinin məlumatına görə, yol xəritəsi müntəzəm və nəticəyönümlü təmasların keçirilməsinə, mövcud müdafiə və hərbi əməkdaşlığın inkişaf etdirilməsinə, eləcə də strateji məsələlərdə koordinasiyanın artırılmasına yönəlib. Bu sənəd çərçivəsində mümkün layihələr, silah alışları və ya iki ölkənin konkret öhdəlikləri barədə təfərrüatlar hələ açıqlanmayıb.
Sənəd Ankara ilə Paris arasında müdafiə əlaqələrinin son aylarda genişləndiyi bir vaxtda imzalanıb. Eyni zamanda, Türkiyənin Fransa və İtaliya ilə SAMP/T hava hücumundan müdafiə sistemi ilə bağlı texniki danışıqları da davam edir. Makron bu məsələni iyul ayında təsdiqləmişdi, lakin onun yeni yol xəritəsi ilə birbaşa əlaqəsi hələlik açıqlanmayıb.
