ABŞ Maliyyə Nazirliyi İranın mayeləşdirilmiş qazını Oman qazı adı altında Cənub və Şərqi Asiya ölkələrinə daşıyan şəxslər, şirkətlər və tankerlərdən ibarət şəbəkəyə qarşı yeni sanksiyalar tətbiq edib.
ArazNews-un Reuters-ə istinadən verdiyi məlumata görə, ABŞ Maliyyə Nazirliyi bildirib ki, sözügedən şəbəkə Birləşmiş Ərəb Əmirlikləri və Çində fəaliyyət göstərən örtük şirkətlərdən, eləcə də xarici bank hesablarından istifadə edərək milyonlarla barel İran maye qazını daşıyıb və ABŞ sanksiyalarından yayınmaq üçün onun mənşəyini gizlədib.
Məlumata əsasən, Marşal adalarında qeydiyyatdan keçmiş beş şirkət, BƏƏ-də yerləşən dörd şirkət və Çində fəaliyyət göstərən bir şirkət daxil olmaqla ümumilikdə 12 qurum sanksiya siyahısına salınıb.
Bundan əlavə, mayeləşdirilmiş qaz daşıyan altı tanker, o cümlədən Panama bayrağı altında üzən dörd gəmi də yeni sanksiyalara məruz qalıb. ABŞ Maliyyə Nazirliyi həmçinin İranın sanksiya altında olan bankları üçün yüz milyonlarla dollar xarici valyuta köçürməkdə ittiham olunan “Mehrdad Gramiyan Nik və Şərikləri” mübadilə şirkətini və onun rəhbərlərini də sanksiya siyahısına daxil edib.
