Bloomberg-in məlumatına görə, İslam Respublikası Beynəlxalq Atom Enerjisi Agentliyinin tam nəzarətini qəbul etməyib. Tehran Agentliyə göndərdiyi rəsmi sənəddə yazıb ki, ABŞ-ın hücum təhdidi davam etdiyinə görə özünü bu nəzarətə borclu hesab etmir. 10 səhifəlik bu sənəd ötən həftənin sonlarında diplomatlar arasında yayılıb.
İslam Respublikası sənəddə iddia edib ki, nüvə obyektlərinə əvvəllər edilən hücumlar və onların təkrarlanacağı ilə bağlı təhdidlər adi yoxlamalara mane olur. Xarici İşlər Nazirliyinin sözçüsü İsmayıl Bəqai həftəlik mətbuat konfransında Tehranın təminatlar üzrə öhdəliklərini dayandırmadığını iddia edib. Onun sözlərinə görə, hazırkı şəraitdə əməkdaşlıq əvvəlki qaydada davam edə bilməz. Bəqai həmçinin Buşehr atom elektrik stansiyasında son günlərdə yoxlama aparıldığını iddia edib.
ABŞ, Böyük Britaniya, Fransa və Almaniya 9 sentyabr tarixli birgə bəyanatda təminatlar üzrə öhdəliklərin müzakirə predmeti olmadığını vurğulamışdılar. Bu dörd ölkənin sözlərinə görə, Təminatlar haqqında sazişin icrası heç bir şəraitdə dayandırıla bilməz.
