Britaniya ordusunun keçmiş paraşütçüsü Karl Buşbi 1998-ci ildə Çilinin ən cənub nöqtəsinə təyyarə ilə gedib ki, oradan İngiltərədəki anasının evinə piyada qayıtsın. O, bu səyahətin 12 il çəkəcəyini proqnozlaşdırırdı, lakin nəhayət bu ay, yola çıxmasından 28 il sonra yenidən İngiltərə torpağına ayaq basıb.
Buşbi əvvəldən özünə söz vermişdi ki, bu yolun bir addımını belə avtomobil, qatar, gəmi və ya təyyarə ilə qət etməyəcək. O, bu piyada səyahət zamanı 29 ölkədən keçib. Alyaskadan Rusiyaya keçmək üçün Berinq boğazının donmasını gözləyib və qütb ayılarından qorunmaq üçün yanında gəzdirdiyi tüfənglə buzun üstündən keçib. Kolumbiya ilə Panama arasında qanunsuzluğun hökm sürdüyü cəngəlliklərdən də keçib və Panamada viza problemi səbəbindən həbs olunub. Viza qaydaları onu hər dəfə hansısa ölkəni tərk etməyə məcbur etdikdə, o, sonradan təyyarə ilə dayandığı həmin nöqtəyə qayıdıb və yolunu oradan davam etdirib.
Piyada getməyin mümkün olmadığı yerlərdə isə üzüb, baxmayaraq ki, öz sözlərinə görə, çox zəif üzgüçüdür. Xəzər dənizini keçmək bir ay çəkib, La-Manş kanalının altındakı tuneldən piyada keçməyə icazə verilmədiyi üçün isə bu su yolunu da üç gün ərzində üzərək qət edib. O, evdən çıxdığı gündən düz 28 il sonra Duvr yaxınlığında İngiltərə sahilinə çatıb və bu səyahət haqqında sənədli film çəkən tanınmış rejissor Verner Hersoq onu orada qarşılayıb.
Buşbi yola düşəndə hələ sosial şəbəkələr yox idi və o, səyahətini qeydə almaq üçün yanında plyonka ilə işləyən ucuz fotoaparat gəzdirirdi. Bu illər ərzində o vaxt azyaşlı uşaq olan oğlu böyüyüb və indi özünün də qızı var; Buşbi bu nəvəsini hələ görməyib. Anası da on ildən artıqdır ki, oğlunu görməyib və hər il onun üçün Milad hədiyyəsini bir kənara qoyub.
Hazırda anasının evinə qədər təxminən 400 kilometr, yəni təqribən Tehran-İsfahan məsafəsi qədər yol qalıb və o, noyabrın əvvəlində təyinat yerinə çatacağına ümid edir. Buşbi deyib ki, dizlərinin vəziyyətindən dayanmaq vaxtının çatdığı aydın görünür, lakin yolun sona çatmasından qorxur, çünki bu piyada yürüş illər boyu onun həyat məqsədi olub. Onun başqalarına mesajı budur ki, insanlar özlərinin düşündüklərindən qat-qat bacarıqlıdırlar.
