Tehran Universitetinin rektoru Məhəmmədhüseyn Ümid tələbələrin geyimini və davranışını araşdırmaq üçün «hicab işçi qrupu»nun yaradıldığını açıqlayıb. Bu işçi qrupu məxfi məlumatlar əsasında tələbələrlə əlaqə saxlayır. Tələbə «həmin davranışı davam etdirməkdə israr etdikdə» isə iş intizam şurasına göndərilir.
Tehran Universitetinin rektorunun İran mediasında yer alan açıqlamalarına görə, bu işçi qrupu təxminən 5-6 ay əvvəl yaradılıb. Qrup universitet rəhbərliyinin «anormal davranış» adlandırdığı halları araşdırır. Ümid bildirib ki, intizam işi açılmazdan əvvəl tələbələrlə söhbət aparılır.
İran universitetləri son illərdə tələbələri, xüsusilə qadınları geyimlərinə görə dəfələrlə çağırıb, təhsildən uzaqlaşdırıb və ya intizam məhdudiyyətləri ilə üz-üzə qoyub. Tehran Universitetində də əvvəllər «hicab keşikçiləri» adlanan qüvvələr fəaliyyət göstərib.
