سون آیلارداکی گلیشمهلر گؤستریر کی، اورتا دوغو تدریجا اؤز عنعنهوی قورولوشوندان اوزاقلاشیر و یئنی معادلهلر فورمالاشماقدادیر؛ بو معادلهلر بؤلگه گوجلرینین یئرینی یئنیدن تعریف ائده بیلر.
آراز نیوزون راپورونا گؤره، آمریکا ایله جومهوری اسلامی آراسیندا گرگینلیگین آزالماسی، بیر سیرا جبههده وکیل شبکهلرین ضعیفلمهسی و بؤلگه اؤلکهلرینین یئنی تهلوکهسیزلیک مکانیزملری قورما چاباسی، اورتا دوغونون یئنی بیر مرحلهیه گیردیگینین علامتلریدیر. اگر بو پروسس داوام ائدرسه، بؤلگهسل امکداشلیغا، اقتصادی اینکیشافا و ترانزیت لایحهلرینه دایانان اویونچولارین چکیسی آرتاجاق.
آردی
بئله بیر شرطده، تورکیه و آذربایجان جومهوریتی بؤلگه معادلهلرینده داها گوجلو رول اویناماغا ایمکان وئرن بیر موقعیه صاحیبدیر. داشیما کوریدورلارینین اینکیشافی، انرژی امکداشلیغی، تیجارتین گنیشلنمهسی و تورک دونیاسی باغلارینین گوجلندیریلمهسی، بو ایکی اؤلکهنی اورتادوغودا فورمالاشماقدا اولان نیظامدا داها تأثیرلی اویونچولارا چئویره بیلر.
بونون قارشیلیغیندا، قارشیدورما سیاستینین داوامی، وکیل قروپلارین ایشلهدیلمهسی و سینیرآشیری گرگینلیکلر هر اؤلکه اوچون آغیر خرجلر گتیره بیلر و اقتصادی و دیپلوماتیک فورصتلری محدودلاشدیرا بیلر.
بو باخیمدان، بؤلگهنین گلهجک رقابتی صیرف حربی اولماقدان چوخ، اقتصادی نفوذ، ترانزیت مسیرلری و استراتژیک ایتتیفاقلار اوستونده اولاجاق.
بوگون اورتادوغودا باش وئرن شئی، سادهجه دؤولتلر آراسیندا گوج یئردگیشمهسی دئییل؛ گلهجک ایللرده بؤلگه نیظامینین شکلینی تعیین ائتمک اوچون بیر رقابتدیر. بو آرادا، ثبات، اقتصادی امکداشلیق و بؤلگهسل باغلانتینی گوجلندیره بیلن اؤلکهلر، احتمالا اورتادوغو گلهجگینده ان بؤیوک رولو اوینایاجاقلار.
