تایماز اورمولو ایله ایلک دفعه اورمودا گؤروشدوک. مرکزده زنجیر خیابانینداکی آتامین توکانیندا. او ایللرده مرکزده آتاما عایید اولان «جاواد عمینین قهوهسی» اورمیه و باشقا شهرلردن گلن میلتچیلرین بیر چوخونون گؤروشمه یئری ایدی و بیر چوخ فعالیتلر اوردا دانیشیلیب اورقانیزه ائدیلیردی.
تایماز اورمولو ایله ده ایلک دفعه اورادا گؤروشدوم. من تورکیه ده اؤیرنجی ایدیم و یای تعطیلی اوچون اورمیهیه گئتمیشدیم. او ایسه تراختور کارخاناسیندا مهندس ایدی. سهو ائتمیرم ایسه ایل 2003 و یا 2004 ایدی، هارداسا 22 ایل اؤنجه. او اورمیهدهکی یولداشلاریمیز ایله چوخدان تانیشیردی و اورتاق فعالیتلر ائلهییردی. دانیشدیغیمیز مساله ده طبیعی کی بللی ایدی؛ آزربایجان میلی حرکتی و باتی آزربایجان سورونو.
تایماز اورمولو سونراکی ایللرده «باتی آزربایجان میلی مودافیعه کومیتهسی» ایله دوغرودان و دولایلی فعالیت ائدیردی. وطن میلت قایغیسی چکن بیر انسان کیمی باتی آزربایجان سورونو ایله مشغول اولدوغو اوچون ایش یئرینده چوخ سورونلار یاشاییردی و باسقیا معروض قالیردی.
بیر نئچه ایل سونرا دا آرتیق اورداکی باسقیلارا دایانابیلمهییب خاریجه چیخماغا مجبور اولدو.
تورکیهده یاشادیغی ایللرده دیرنیش تشکیلاتی منسوبو اولاراق نئچه ایل یاخین امکداشلیغیمیز اولدو. تشکیلاتین ایشچی کومیتهسی سوروملوسو ایدی. چونکو گونئی آزربایجاندا اؤزو ده بیر نئچه کارخانادا ایشلهمیشدی و ایشچیلرین سورونلاری ایله یاخیندان تانیش ایدی. «اورمو ایشچیلری»نی تشکیلاتین بیر ارقانی اولاراق وبلاگ شکلینده باشلادی. داها سونرا «آزربایجان ایشچیلری»نه دؤنوشدوروب و وبسایت اولاراق دوام ائتدیک. میلی حرکتین ایشچی حاقلاری ساحهسینده گرچکدن چوخ زحمتلر چکدی و چوخ امکلر وئردی. او ایللرده ان یاخین اولدغوم و ان چوخ برابر چالیشدیغیم موجادیله یولداشلاریمدان بیری ایدی.
آمریکایا داشیندیقدان سونرا بیر آز یاشام شرطلریندن، بیر آز دا فرقلی گؤروشلریندن دولایی تشکیلاتدان آیریلدی. زامان زامان دا بیزه تنقیدلر ائتدی.
تایماز بگین اؤزونه خاص کاراکتری وار ایدی؛ صمیمی اما چتین؛ دئییب گولن و نشهلی اما بیر آز دا تئز عصبلهنن؛ ارادهلی اما بیر آز دا تئز جانلی؛ دلی دولو، انرژیک و یاشام دولو؛ میلی مساله یه چوخ حساس و تعویض وئرمهین ...
اصلا میلی داعوادان و میلی جیزغیدان اوزاقلاشمادی. سون ایللرده بعضاً سرت تنقدلر ائدیردی؛ ملی داعوادا کیمسهیه ارفاق قایل اولماییردی؛ دوغرو بیلدیگینی آچیق دانیشیردی ...
وفات خبرینی ائشیدنده بیر آندا دوشونجه دونیامدا اورمیهیه قاییتدیم. مرکزده، عطایی خیابانیندا، ایالتده تایماز بگله آددیملادیغیم آنلار گلدی گؤزومون قاباغینا. قهوهخانادا چای ایچیب اوزون اوزون میلی حرکتی آنالیز ائلهدیگیمیز آنلار کئچدی گؤزومونون اؤنوندن...
آنکارادا قیزیلآیدا و قورتولوش پارکیندا ایچدیگیمیز چایلار و مهاجرت یاشامینین چتینلیکلرینی پایلاشدیغیمیز آنلار کئچدی گؤزومون اؤنوندن...
و دوستلارین گروهدا یازدیغی مساژی گؤرونجه الیمده قورویوب قالان تلفن: «تایماز بگ وفات ائدیب ...»
بیر سورهدیر ارتباطیمیز آز ایدی. بیزه تنقیدلری وار ایدی.اؤزونه گؤره حاقلی، بیزه گؤره چتین. اما اونجا ایللیک یاشانمیشلیغین سون بولدوغونو و بیر داها یاشانمایاجاغینی بیر آندا اؤیرنمک راحات دئییلمیش ...
اورمیهنی نه قدر چوخ اؤزلهدیگینی یازدیغی یازیسینی اوخودوغوم زامان بیر داها آنلادیم کی نه درین بیر باغیمیز و اورتاق حسرتلریمیز وار ایمیش ... شهر چاییندا دولانماق، ایالتده آددیملاماق و مرکزده قهوه خانادا بیر چای ایچمک ...
مکانین جنت اولسون یولداش؛
عؤمرون بویونجا ان بؤیوک قایغین و اؤزلهمین گونئی آزربایجان و اورمیه اولدو.
اما زحمتلرین بوشا گئتمهدی؛ گئتدیگین یولون بو گون چوخ یولچوسو وار و اینانیرام کی بیر گون خیال ائتدیگین آزاد گونئی آزربایجان و اورمیه گرچک اولاجاق.
مجید جوادی آراز
آنکارا ۱۳-۰۷-۲۰۲۶
