Tehranın hava keyfiyyəti indeksi şənbə günü, noyabrın 14-də 172-yə çatıb. Bu göstərici ilə paytaxtın havası "qırmızı" vəziyyətə keçib və cəmiyyətin bütün qrupları üçün sağlamlığa zərərlidir. "Fars" xəbər agentliyinin məlumatına görə, Tehranın 11-ci və 19-cu rayonları şəhərin ən çirkli əraziləri olub.
Son günlər Tehranda havanın çirklənməsi davamlı olaraq artıb. Meteorologiya xidmətinin açıqladığına görə, bu vəziyyətin əsas səbəbi havanın durğunluğu və ölçüsü 2,5 mikrondan kiçik olan asılı hissəciklərin toplanmasıdır.
Çirklənmə ilə əlaqədar Tehranda avtomobillərin hərəkətinə məhdudiyyət qoyulub. Həmçinin açıq havada idman fəaliyyətləri və məktəblərin səhər tədbirləri qadağan edilib.
