Onilliklərdir ki, böyük qidalanma tədqiqatları müntəzəm olaraq dondurma yeyən insanların 2-ci tip diabetə digərlərinə nisbətən daha az tutulduğunu göstərir, lakin alimlər hələ də bunun səbəbini bilmirlər. Harvard Universitetində aparılan uzunmüddətli tədqiqatda həftədə iki porsiya dondurma yeyən kişilərdə bu xəstəliyə tutulma riski təxminən 22 faiz aşağı olub.
Harvardda təhsil alan doktorant da aşkar edib ki, diabet xəstələri arasında dondurma yeyənlər ürək xəstəliyinə təxminən 12 faiz az tutulublar. Onun professorları bu nəticəni mümkün olan bütün yollarla yenidən yoxlamağı xahiş ediblər, lakin bu əlaqə yenə də qüvvədə qalıb.
Mütəxəssislərin əksəriyyəti hesab edir ki, bu məlumatlarda səbəb və nəticə yerini dəyişib. Xəstələnən və ya çəkisi artan insanlara şirniyyatdan imtina etmək tövsiyə olunur və buna görə də dondurma yeməyə davam edənlər statistikada olduqlarından daha sağlam görünürlər. Qidalanma ilə bağlı sorğu anketləri də o qədər dəqiq deyil və artıq çəkisi olan insanlar desert istehlakını real həcmindən az göstərə bilərlər.
Bəzi alimlər hesab edir ki, dondurmanın tərkibində konfetdən fərqli olaraq şəkərin qana daxil olma sürətini azaldan süd zülalı və süd yağı var, onun tərkibindəki zərdab zülalı isə insulinin fəaliyyətinə kömək edə bilər. Bununla belə, hələ heç bir klinik sınaqda dondurmanın həqiqətən diabetin qarşısını alıb-almadığı araşdırılmayıb, bəzi digər tədqiqatlar isə çox miqdarda dondurma yeməyi diabet və qaraciyərin piylənməsi ilə əlaqələndirib.
2014-cü ildə bu sahədə geniş təhlil dərc olunanda media daha çox yoğurta diqqət ayırıb, dondurma ilə bağlı nəticə isə demək olar ki, diqqətdən kənarda qalıb. Lakin bu il amerikalı həkim Ezekiel Emanuel uzunömürlülüyə həsr olunmuş və ən çox satılan kitabında «Dondurmanızı yeyin» fikrini altı qaydasından biri kimi irəli sürüb. Onun sözlərinə görə, bu tövsiyənin səbəbi dondurmadakı zülal, onun verdiyi həzz və başqaları ilə birlikdə yeyilməsidir.
Buna baxmayaraq, heç kim hər gün çox miqdarda dondurma yeməyi tövsiyə etmir, iddia yalnız ondan ibarətdir ki, arabir bir porsiya dondurma yemək, ehtimal ki, ziyanlı deyil.
