Təbrizin zibildaşıma parkının sürücüləri 21 aban, cümə axşamı günü işi dayandıraraq etiraz aksiyası keçiriblər.
Aksiyada zibil, lil və tikinti tullantılarını daşıyan avtomobillərin, eləcə də zibili Əspirandakı basdırılma sahəsinə aparan treylerlərin sürücüləri iştirak ediblər. Onlar sosial sığortanın olmamasına və illik maaş artımının ödənilməməsinə etiraz edirlər. Bu sürücülərdən bəzilərinin təxminən 15 illik iş stajı olsa da, onların hələ də sığortası yoxdur.
Təbriz Maşınqayırma zavodunun işçiləri də son günlərdə maaşların nizamsız ödənilməsinə etiraz olaraq bir neçə gün ardıcıl tətil ediblər. Bu ilin əvvəlindən zavodun işçiləri əmək haqlarının gecikdirilməsinə dəfələrlə etiraz ediblər.
Bir neçə ay əvvəl də onlardan təxminən 1600 nəfər ordibeheşt və xordad aylarına aid ödənilməmiş maaşlarına görə etiraz etmişdi.
