OpenAI American Express, Mastercard və Visa ilə birgə «ChatGPT Wallet» adlı rəqəmsal pul kisəsini təqdim edib. Bu pul kisəsi vasitəsilə süni intellekt agentləri istifadəçinin real kart məlumatlarına çıxış əldə etmədən alış-veriş edir. Xidmət ilk mərhələdə ABŞ-də məhdud sayda «Pro» abunəçisinə «Dot» süni intellekt agenti vasitəsilə təqdim olunacaq.
İstifadəçi kartını bir dəfə qeydiyyatdan keçirir. Hər alışdan əvvəl məhsulları, yekun məbləği və seçilmiş kartı görür, ardından Face ID və ya barmaq izi ilə təsdiqləyir. Bundan sonra ödəniş şəbəkəsi kart məlumatlarının əvəzinə token göndərir və məbləğ həmin kartdan çıxılır.
OpenAI şirkətinin bildirdiyinə görə, hər həftə 1,2 milyard nəfər ChatGPT-dən istifadə edir və onların əksəriyyəti məhsulları araşdırmaq və müqayisə etmək üçün ona müraciət edir. Şirkət istəyir ki, gələcəkdə istifadəçilər xərc limiti, məhsul növü və ya zaman aralığı müəyyənləşdirərək alış-verişi tamamilə süni intellekt agentlərinə həvalə etsinlər.
