İnqilab Keşikçiləri Korpusunun Hərbi Dəniz Qüvvələrinin iddiasına görə, Hörmüz boğazının şərqində maye qaz daşıyan gəmi dəniz minasına toxunub və gəmidə «güclü partlayış» baş verib. Bu qüvvələrin ictimaiyyətlə əlaqələr xidməti xəbəri noyabrın 13-də, cümə günü yaydığı bəyanatda açıqlayıb.
Keşikçilər Korpusu gəminin «icazəsiz marşrutla» keçdiyini və xəbərdarlıqlara məhəl qoymadığını iddia edir. Korpusun bəyanatında həmçinin gəminin «ABŞ qırıcılarının himayəsi altında» hərəkət etdiyi bildirilib.
Korpusun bəyanatı Donald Trampın müsahibəsi yayımlandıqdan bir gün sonra verilib. ABŞ prezidenti həmin müsahibədə Hörmüz boğazının «tamamilə» ABŞ-ın nəzarəti altında olduğunu və İslam Respublikasının bu su yoluna nəzarəti itirdiyini vurğulayıb. O, həmçinin İslam Respublikasının süqutu hətta 26 ay çəksə belə, dəniz blokadasını davam etdirməyə hazır olduğunu deyib.
