Məsud Pezeşkiyanın sözlərinə görə, Müctəba Xameneyi ABŞ ilə danışıqlar aparmaq səlahiyyətini hökumətə verib. Prezident bunu bazar ertəsi ostandarlar və bələdiyyə başçıları ilə görüşdə deyib. O, hökumətin Vaşinqtonla fikir ayrılıqlarını dialoq yolu ilə həll etməyə çalışdığını da əlavə edib.
Xarici işlər naziri Abbas Əraqçi Türkmənistana səfəri zamanı ABŞ ilə mesaj mübadiləsi aparıldığını və Qətər, eləcə də Pakistan vasitəsilə intensiv məsləhətləşmələr keçirildiyini bildirib. Onun sözlərinə görə, Tehran razılaşma üçün öz şərtlərini təqdim edib. Bununla belə, Əraqçi hərbi əməliyyat olacağı təqdirdə cavabın «əvvəlkindən daha ağır» olacağı ilə hədələyib. Prezidentin birinci müavini Məhəmmədrza Arif isə Vaşinqtonun mesajlarının İranın «qələbəsini» qəbul etdiyini göstərdiyini iddia edib.
Diplomatik irəliləyişə olan ümid neftin qiymətini aşağı salıb: Brent markalı neft 6,1 faiz ucuzlaşaraq 106 dollar 54 sentə düşüb, ABŞ nefti isə 6,3 faiz ucuzlaşıb.
