Körfəzdən keçən neft tankeri noyabrın 2-də, bazar ertəsi səhər saatlarında gövdəsinin sol tərəfindən iki naməlum mərmi ilə vurulub. Böyük Britaniyanın Dəniz Ticarəti Əməliyyatları Təşkilatı hadisənin Səudiyyə Ərəbistanının Ras əl-Xafci məntəqəsindən 72 dəniz mili şərqdə baş verdiyini açıqlayıb. Təşkilatın sözlərinə görə, gəmi cənub-şərq istiqamətində hərəkət edirdi.
Bu hücum Qatarın mayeləşdirilmiş qazını daşıyan bir gəminin hədəfə alınmasından cəmi bir gün sonra baş verib. Körfəz Əməkdaşlıq Şurası həmin hadisəni regionda «gərginliyin təhlükəli şəkildə artması» kimi qiymətləndirib.
SEPAH-ın Hərbi Dəniz Qüvvələri iddia edir ki, oktyabrın 25-dən bu yana Hörmüz boğazında 11 «qayda pozan» tanker yanıb, onların bəziləri isə batıb. İrandakı media da bazar ertəsi boğazın şərqində minaya toxunan bir neft tankerində yanğın baş verdiyini xəbər verib. Donald Tramp daha əvvəl noyabrın 3-də keçiriləcək aralıq seçkilərdən sonra İslam Respublikasına qarşı məhdud hərbi əməliyyat həyata keçirəcəyi ilə hədələmişdi.
