Reuters agentliyinin xəbərinə görə, məlumatlı dörd rəsmi bildirib ki, avqustun sonlarında ABŞ ordusunun əməkdaşları üçün nəzərdə tutulmuş ən azı altı mağazanın soyuducu sistemlərində şübhəli nasazlıqlar baş verib.
Ən qəribə hallardan birində Arizona ştatındakı "Fort Huachuca" hərbi bazasının dondurucuları gecə vaxtı gözlənilmədən buzəritmə rejiminə keçib və ərzaq məhsullarını soyuq saxlamaq əvəzinə onların temperaturunu artırıb.
Pentaqon açıqlayıb ki, ordunun Kiber Komandanlığı və cinayət təhqiqatı qurumları bu hadisələri araşdırır.
Reuters-in məlumatına görə, amerikalı müfəttişlər Fransada soyuducu sistemlərinə qarşı törədilən oxşar hücumlarla bağlı fransız rəsmiləri ilə də əməkdaşlıq edirlər.
Hələlik ABŞ bazalarında kiberhücumun baş verdiyi qəti şəkildə təsdiqlənməyib, bu nasazlıqların ehtimal olunan törədicisi də məlum deyil.
