Araz News: Traktor Azərbaycan və Bəndər-Ənzəlinin "Malavan" komandaları arasındakı oyun türk xalqına qarşı səsləndirilən təhqiramiz və irqçi şüarlardan sonra baş tutmayıb. Buna baxmayaraq, Traktorun 3:0 hesabı ilə məğlub elan edilə biləcəyi barədə xəbərlərin yayılması İran futbolunda irqçiliyə ikili yanaşma məsələsini yenidən müzakirə mövzusuna çevirib.
Media xəbərlərinə görə, Futbol Federasiyasının İntizam Komitəsi baş tutmayan Traktor–Malavan oyunundakı hadisələri araşdırdıqdan sonra, ehtimal ki, Traktorun 3:0 hesabı ilə məğlub sayılması barədə qərar çıxaracaq. Bununla belə, bu qərar hələ rəsmi olaraq elan edilməyib.
Komandaların oktyabrın 18-də Bəndər-Ənzəlidəki Sirus Qayıqran stadionunda keçirilməsi planlaşdırılan oyunu "Malavan" azarkeşlərinin matç başlamazdan əvvəl səsləndirdiyi təhqiramiz şüarlardan sonra ləğv edilib.
Traktor klubu bəyanatlarında komanda oyunçularının və Azərbaycan xalqının kimliyinin irqçi və alçaldıcı şüarların hədəfinə çevrildiyini vurğulayıb. Klub həmçinin bildirib ki, oyunçuların ailələrinin təhqir edilməsi və irqçi şüarların davam etməsi oyunun keçirilməsi üçün şərait qoymayıb, meydanı tərk etmək isə bu vəziyyətə etiraz reaksiyası olub.
Media xəbərlərinə əsasən, Futbol Federasiyasının İntizam Komitəsi iş üzrə iclas keçirdikdən sonra oyunun təkrar keçirilməsi və ya "Malavan"ın xeyrinə 3:0 hesabının elan edilməsi də daxil olmaqla müxtəlif variantları nəzərdən keçirib.
Eyni zamanda, bəzi xəbərlərdə bildirilir ki, hər iki kluba oyunun təkrar keçirilməsinə yazılı razılıqlarını bildirmək üçün bazar ertəsinə qədər vaxt verilib. Bundan başqa, azarkeşlərinin davranışına görə "Malavan"a pul cəzası verilməsi, hətta xal çıxılması ehtimalı da gündəmə gəlib.
Traktor Azərbaycan irqçi şüarlara etiraz etdiyinə görə məğlub elan edilərsə, belə bir qərar praktikada irqçiliyə mükafat olacaq, ayrı-seçkilik və təhqirin qurbanları isə cəzalandırılacaq. Təəssüf ki, bu vəziyyət İranda institusional problemə çevrilib.
