Özbəkistanda Şavkat Mirziyoyevin prezidentliyi dövründə həyata keçirilən iqtisadi islahatlar xarici investorların diqqətini cəlb edib.
Ölkə iqtisadiyyatı son beş ildə orta hesabla təxminən 6 faiz artıb, birbaşa xarici investisiyaların həcmi isə 2021-ci ildəki 2,3 milyard dollardan 2025-ci ildə 4,4 milyard dollara çatıb.
Kapitalın ölkəyə giriş və çıxışına qoyulan məhdudiyyətlərin azaldılması, viza qaydalarının sadələşdirilməsi və rəqəmsal ödənişlərin genişləndirilməsi son illərdə baş verən dəyişikliklər sırasındadır. Bununla belə, dövlət şirkətləri hələ də bank sektoru, enerji və mədənçilik kimi əsas sahələrdə dominant mövqe tutur. Hökumət özəlləşdirməni genişləndirməyi planlaşdırır, Özbəkistan Milli İnvestisiya Fondu isə may ayında Londonda keçirdiyi ilkin kütləvi səhm təklifində (IPO) 690 milyon dollar cəlb edib.
İnvestorları maraqlandıran əsas sual bu islahatların ölkənin inzibati strukturunda nə dərəcədə davamlı olacağıdır. Analitiklər bürokratiyanın bəzi təbəqələrinin iqtisadiyyatın daha da liberallaşdırılmasına müqavimət göstərdiyini bildirirlər, "Moody's" kredit reytinq agentliyi də islahatların ləngiməsinin və ya dayandırılmasının Özbəkistanın kredit reytinqinə təzyiq göstərə biləcəyini açıqlayıb. Mirziyoyev isə öz növbəsində islahatların davam etdiriləcəyini və xarici kapitalın cəlb olunmasının vacibliyini vurğulayır.
