ABŞ dollarının qiyməti bu gün Tehranın sərbəst bazarında 271 min tüməni keçərək yeni tarixi rekord vurub. Eyni zamanda avro təxminən 305 min tümən, Britaniya funt sterlinqi isə təxminən 359 min tümən səviyyəsində alınıb-satılıb.
Qızıl və sikkə bazarında da artım tendensiyası davam edib. İmami sikkəsinin qiyməti təxminən 273 milyon tümənə çatıb. Yarım sikkə 142 milyon tümənə yaxın, dörddəbir sikkə isə təxminən 77 milyon tümən qiymətləndirilib.
Dollar cəmi bir gün ərzində təxminən 3 min tümən, dörd gün əvvəlki ilə müqayisədə isə təxminən 16 min tümən bahalaşıb. Hazırkı məzənnəni ötən ilin sentyabr ayının sonlarındakı təxminən 114 min tümənlik göstəricilə müqayisə etdikdə dolların tümənə qarşı dəyəri bir il ərzində 138 faizə yaxın artıb. Bu tendensiya İran pul vahidinin dəyərsizləşməsinin davam etdiyini və valyuta bazarındakı qeyri-sabitliyi göstərir.
