İranda müəllimlərin əmək haqqı ilə yaşayış xərcləri arasındakı uçurum elə həddə çatıb ki, bir sıra təhsil işçiləri istefa ərizələrini sosial şəbəkələrdə paylaşaraq ağır güzəranlarına etiraz ediblər. Bu zaman yeni işə qəbul olunmuş müəllim bəzən fəhlənin minimum əmək haqqından da az maaş alır.
İLNA-nın məlumatına görə, İran Müəllimlərin Həmkarlar Təşkilatları Koordinasiya Şurasının sözçüsü Məhəmməd Həbibi müəllimlərin orta aylıq gəlirinin təxminən 25 milyon tümən olduğunu bildirib. Onun sözlərinə görə, bu məbləğ rəsmi elan olunmuş yoxsulluq həddinin yarısından da azdır. Yeni işə qəbul olunmuş bəzi müəllimlərin maaşının isə cəmi 16-17 milyon tümən olduğu qeyd edilib.
Həbibi son istefaları müəllimlərin illərdir təhsilə və təhsil işçilərinin güzəranına göstərilən biganəliyə qarşı «vətəndaş müqaviməti»nin bir hissəsi kimi dəyərləndirib. O, təqaüdə çıxanların sayı artdıqca və kadrlar sistemi tərk etdikcə ümumi təhsil sisteminin ciddi müəllim çatışmazlığı ilə üzləşəcəyi barədə xəbərdarlıq edib.
Həbibi özəl məktəblərdə çalışan müəllimlərin vəziyyətini də «işçi qüvvəsinin istismarı» adlandırıb. Onun sözlərinə görə, bu müəllimlərin çoxu nə Əmək Qanununun nəzərdə tutduğu minimum əmək haqqını alır, nə tam sığortaya malikdir, nə də iş təminatı var.
Həmkarlar fəalı onu da deyib ki, iqtisadi təzyiq və orta təbəqənin alıcılıq qabiliyyətinin kəskin düşməsi şagirdlərin özəl məktəblərdən çıxmasına və dövlət məktəblərinə təzyiqin artmasına da səbəb olub. Bu proses əyalət şəhərlərində bəzi məktəblərin bağlanması və müəllimlərin işsiz qalması ilə müşayiət olunub. İri şəhərlərdə isə bir çox müəllim tədrisi buraxıb daha gəlirli iş axtarmağa məcbur qalıb.
