BƏƏ Xarici İşlər Nazirliyinin dövlət naziri Xəlifə Şahin əl-Marar Nyu-Yorkda keçirilən BMT Baş Assambleyasının 81-ci sessiyasında Böyük Tunb, Kiçik Tunb və Əbu Musa adalarının ölkəsinə məxsus olduğunu bildirib. O, BƏƏ-nin «bu adaların İran tərəfindən işğalının» davam etməsini qəbul etmədiyini açıqlayıb.
Əl-Marar vurğulayıb ki, Əbu-Dabi həmişə bu mübahisənin sülh yolu ilə həllinin tərəfdarı olub və iki yol təklif edir: birbaşa danışıqlar və ya Beynəlxalq Ədalət Məhkəməsinə müraciət. O qeyd edib ki, ölkəsinin yanaşması gərginliyin azaldılmasına, dialoqa, dövlətlərin suverenliyinə hörmətə və mehriban qonşuluğa əsaslanır. Əl-Marar gücün qanunsuz tətbiqini və ya güc tətbiq etməklə hədələməyi də rədd edib.
Öz növbəsində, İran rejiminin BMT yanındakı nümayəndəliyinin müşaviri Nasir Əsədi BƏƏ tərəfinin açıqlamalarına cavab olaraq Əbu-Dabinin iddiasını rədd edib. O, üç adanı İran ərazisinin ayrılmaz hissəsi adlandırıb.
Böyük Tunb, Kiçik Tunb və Əbu Musa adaları 1971-ci ildə, Məhəmmədrza Pəhləvinin hakimiyyəti dövründə İranın nəzarətinə keçib. BƏƏ bu adaların ona məxsus olduğunu israrla bildirir, İran isə onları öz ərazisi hesab edir. Adalar Hörmüz boğazının girişinə və mühüm gəmiçilik marşrutlarına yaxın yerləşir. Bu, onilliklərdir davam edən mübahisəyə strateji əhəmiyyət qazandırıb.
