İranla ABŞ arasında gərginlik yenidən təhlükəli mərhələyə daxil olub. Tərəflər qarşılıqlı hərbi hücumlardan sonra bir-birini atəşkəsi pozmaqda ittiham edir. Bu hadisələr neft bazarında və Körfəz bölgəsinin təhlükəsizliyində yeni narahatlıq yaradıb.
ArazNews-un məlumatına görə,Sepah ABŞ-ın Bəndər Abbas yaxınlığındakı hücumlarına cavab olaraq Amerika hərbi bazalarından birini hədəfə aldığını açıqlayıb. Eyni zamanda, ABŞ rəsmiləri Amerika ordusunun İranın bir neçə hücum dronunu vurduğunu və Bəndər Abbasdakı bir pilotsuz aparat idarəetmə mərkəzini hədəf aldığını bildiriblər.
Bu qarşıdurmalardan sonra neft qiymətləri yenidən yüksəlib və Hörmüz boğazının gələcəyi ilə bağlı narahatlıqlar artıb. Küveyt raket və dron hücumlarının qarşısının alındığını açıqlayıb, İsrail isə ölkənin şimalında hava təhlükəsi xəbərdarlığı verildiyini bildirib.
Donald Tramp isə Tehranla Hörmüz boğazının idarə olunması ilə bağlı mümkün razılaşma xəbərlərini təkzib edib və heç bir ölkənin bu beynəlxalq su yoluna nəzarət etməsinə icazə verilməyəcəyini deyib. O həmçinin xəbərdarlıq edib ki, lazım gələrsə ABŞ boğaza nəzarət etmək istəyən hər hansı tərəfə qarşı hərəkətə keçəcək.
Bu arada İran rejimi sanksiyaların ləğvi, nüvə proqramının qorunması və Hörmüz boğazındakı rolunda israr edir. Bu məsələlər Tehranla Vaşinqton arasındakı danışıqların əsas düyünləri olaraq qalır.
