Böyük Britaniyanın Xarici İşlər Nazirliyi 13 fərvərdin tarixində İran rejiminə Hörmüz boğazının açılması üçün təzyiq yollarını müzakirə etmək məqsədilə 40-dan çox ölkənin iştirakı ilə iclas keçirib.

ArazNews xəbər verir ki, Böyük Britaniyanın xarici işlər naziri Yvette Cooperin sədrliyi ilə onlayn formatda keçirilən görüşdə Britaniya, Almaniya, Avropa İttifaqı və Körfəz ölkələri iştirak edib. Rəsmi açıqlamaya görə, iclasın məqsədi İran üzərində “bütün mümkün diplomatik, iqtisadi və koordinasiyalı tədbirlərin” müzakirəsi olub.

Cooper bildirib ki, İranın beynəlxalq gəmiçiliyə hücumları və qlobal iqtisadiyyatı “girov götürmək” cəhdləri münaqişədə tərəf olmayan ölkələrə də ciddi zərər vurur.

Son həftələrdə Sepah tərəfindən Hörmüz boğazının bağlanması nəticəsində aviasiya yanacağının qiyməti artıb, Afrikada gübrə bahalaşıb, bəzi bölgələrdə ərzaq çatışmazlığı yaranıb və Asiyanın bir sıra ölkələrində, o cümlədən Hindistanda qaz qıtlığı müşahidə olunub.

Avropa İttifaqının xarici siyasət rəhbəri Kaja Kallas isə vurğulayıb ki, İran Hörmüz boğazından keçən gəmilərdən rüsum almamalıdır.