واشینقتونلا تهران آراسیندا قارشی‌دورما ائله بیر مرحله‌یه چاتیب کی، اقتصادی تحریم‌لر و دنیز محاصره‌سی داها گئنیش عسگری باسقینین یالنیز باشلانغیجی اولا بیلر. بئله بیر پلانین مقصدی، ایران جمهوریتینی نوکلئر (هسته‌ای) پروقرام (برنامه)، موشک گوجو، هورموز بوغازی و وکیل سیلاحلی قروپلارا دستک مؤوضوعولاریندا آمریکانین شرط‌لرینی قبول ائتمه‌یه مجبور ائتمکدیر.
ایران نفتینی آلان چین بانک‌لاری و شرکت‌لرینه قارشی تحریم‌لرین آرتیریلماسی و نفت ایخراجینین محدودلاشدیریلماسی، ایرانین مالی قایناقلارینا باسقینی داها دا آرتیرا بیلر. آنجاق تَک باشینا اقتصادی محاصره تهرانین حساب‌لارینی دَییشدیرمک اوچون یئترلی اولمایا بیلر.
سونراکی مرحله‌ده، آمریکانین موشک تأسیساتلارینا، نوکلئر مرکز‌لره، سپاه پاسدارانلا باغلی انرژی آلت‌یاپیلارینا و عسگری قوماندانلیق مرکز‌لرینه هاوا حمله‌لرینی یئنی‌دن باشلاتماسی احتمالی گونده‌مده‌دیر. بئله حمله‌لر ایرانین عسگری و اقتصادی گوجونو ضعیفلده بیلر.
داها ریسکلی سئچیم، ایران نفت ایخراجینین اساس داماری اولان خارک آداسینی و یا خلیجده‌کی استراتژیک آدالاری اَله کئچیرمک اوچون محدود قورو عملییاتی‌دیر. بو بؤلگه‌لر اوزرینده نظارت، مذاکره‌لرده یئنی بیر باسقی آراجی یارادا بیلر، آنجاق ساواشین داها دا گئنیشلنمه ریسکینی ده آرتیرار.
عینی زاماندا، اسرائیلله ایشبیرلیک ایچینده استخبارات باسقی‌لارینین آرتیریلماسی و ایرانین حاکمیت یاپیسی (ساختاری) ایچینده‌کی اختلاف‌لاردان یارارلانماق دا بو پلانین (راهبردین) باشقا بیر پارچاسی اولا بیلر.
بونونلا بیرلیکده، عسگری باسقینین آرتیریلماسی تهرانین موطلق شکیلده گئری آددیم آتماسینا گتیریب چیخارمایا بیلر. عکسینه، آمریکا اوس‌لارینا (پایگاه‌لارینا)، بؤلگه‌نین انرژی آلت‌یاپیلارینا و بین‌المللی گمی‌چیلیگه قارشی جواب حمله‌لرینین آرتماسی ریسکینی یارادا بیلر.
واشینقتونون اساس چتین‌لیگی، اقتصادی باسقی و عسگری اوستونلوگو قالیجی سیاسی امتیازلارا چئویرمکدیر؛ بونو ایران جمهوریتی ایله قارشی‌دورمانی گئنیش و چوخ‌خرجلی بیر ساواشا چئویرمدن ائتمک ایسه اَن بؤیوک مسئله اولاراق قالیر.
