آراز نیوز: گونئی آذربایجان اَصیللی سوئد پارلمانی میلت وکیلی آیلین نوری (فاضلیان) سوئد پارلمانی آچیلیش مراسمینه آذربایجان میلّی گئیمی ایله قاتیلـیب. میلت وکیلینین بو آددیمی آذربایجان مئدیاسیندا انعکاس تاپیب.
موساواتین یایدیغی خبرهده بیلدیریلیر کی، آیلین نوری میلّی گئیم سئچیمینی اؤز تاریخی و میلّی منسوبیّتی ایله علاقهلندیریب. او، سوئد توپلومونون بیر حیسّهسی اولماغین انسانین اؤز کئچمیشیندن و مدنی کیملیگیندن ایمتینا ائتمهسی آنلامینا گلمهدیگینی وورغولاییب.
آیلین نوری بیلدیریب کی، عائلهسی اونون دوغولماسیندان اؤنجه سوئده کؤچوب اما والدینلریندن آلدیغی آذربایجان مدنی میراثی اونون کیملیگینین آیریلماز حیسّهسیدیر.
سوئد پارلمانینین رسمی معلوماتینا گؤره، ۱۹۹۲-جی دوغوملو آیلین نوری سوسیال-دموکرات پارتییاسینی تمثیل ائدیر و ایلک دفعه ۲۰۱۸-جی ایلده میلت وکیلی اولوب.
