تورکییه جومهورباشقانی رجب طیب اردوغان، ۲۶ سپتامبر تورک دیلی بایرامی مناسبتیله یاییملادیغی مئساژدا، تورکجهنین یالنیز بیر ارتباط وسیلهسی اولمادیغینی، عئینی زاماندا تاریخین، کولتورون، مدنیت بیریکیمینین و اورتاق حافیظهنین داشیییجیسی اولدوغونو بیلدیردی.
اردوغان، تورکجهنین مینلرجه ایللیک کؤکلو گئچمیشدن گلن بؤیوک بیر زنگینلیگه صاحیب اولدوغونو وورغولایاراق دئدی:
«تورکجهمیز میللتیمیز اوچون یالنیز آنلاشما وسیلهسی دئییل؛ تاریخیمیزین، کولتوروموزون، مدنیت بیریکیمیمیزین و اورتاق حافیظهمیزین داشیییجیسیدیر. آنا دیلیمیز تورکجه، مینلرجه ایللیک کؤکلو گئچمیشیمیزدن سوزولوب گلن بؤیوک بیر مدنیت بیریکیمینی اؤزونده ساخلاییر. عصیرلر بویو مختلف جغرافیالاردا، مختلف میللتلرله تماسدا اولاراق زنگینلشن تورکجهمیز، شعردن ادبیاتا، بیلیمدن صنعته قدر حیاتیمیزین هر ساحهسینده میللتیمیزین دویغو و دوشونجه دونیاسینا ترجومان اولموشدور.»
تورکییه جومهورباشقانی ۲۶ سپتامبر تورک دیلی بایرامی مناسبتیله هر کَسین اوزَرینه دوشن وظیفهنین، تورکجهنی گئچمیشدن قالان بؤیوک بیر میراثین امانتی کیمی قوروماسی، زنگینلشدیرمهسی و گلهجک نسیللره ان گوجلو شکیلده چاتدیرماسی اولدوغونو بیلدیردی.
او، تورکجهنین دوغرو، گؤزل و دیققتلی ایستیفادهسینی گئنیشلندیرمهیین، اوشاقلار و گنجلرین دیله اولان سئوگیسینی گوجلندیرمهیین هامینین اورتاق مسئولیتی اولدوغونو وورغولادی.
اردوغان دئدی: «اونوتمایاق کی، دیلینه صاحیب چیخان میللت، تاریخینه و گلهجگینه ده صاحیب چیخار.»
تورکیه جومهورباشقانی مئساژینین سونوندا، تورک دیلی بایرامینین تورکجهنین داها دا زنگینلشمهسینه و دونیادا داها گوجلو شکیلده وارلیق گؤسترمهسینه سبب اولماسینی آرزولادی.
او، تورکجهنین گلیشمهسینه و یاشادیلماسینا امک وئرن بوتون دیل و کولتور بؤیوکلرینی رحمت و میننتله یاد ائدهرک، «۲۶ سپتامبر تورک دیلی بایرامیمیز قوتلو اولسون» دئدی.
آتاتورکون تاپشیریغی ایله ۱۲ جولای ۱۹۳۲-ده «تورک دیلی تدقیق جمعیتی» قورولدو و اونون تاپشیریغی ایله بیرینجی تورک دیلی قورولتایی ۲۶ سپتامبر ۱۹۳۲-ده دولماباغچا ساراییندا توپلاندي. قورولتای بو گونو تورک دیلی بایرامی گونو اولاراق قئید ائدیلمهسینی تکلیف ائتدی و عوضولرین سسی ایله قبول ائدیلدی.
