- شریفه جعفری
من، گۆنئی آذربایجانلی شاعیر و یازیچی شریفه جعفری، برلینده یاشایان بیر صنعتچی اولاراق، باکیدا آتاتورک مرکزینده کئچیریلن «تورک دونیاسی قادین شاعیرلر بولوشماسی»نا قاتیلماق شرفینی یاشادیم. تورک دونیاسی قادین شاعیرلر بیرلیگینین تشببوسو ایله کئچیریلن بو گؤروشمه، تورک دونیاسینین موختلیف بؤلگهلریندن گلن قادین شاعیرلری بیر آرایا گتیردی.
منیم اوچون باکییا ائتدیگیم بو سفر، سادجه بیر ادبیات تدبیرینه قاتیلماق دئمک دئییلدی. باکی، وطنیمین او بیری یاریسیدیر. بو شهرده اورتاق یادداشیمیزین، دیلیمیزین و کولتوروموزون بیر پارچاسینی یئنیدن حیس ائتدیم. بلکه ده ائله بو اوزدن، قازاقیستان، تورکیه، قیرغیزیستان، اؤزبکیستان، تاتاریستان، باشقوردیستان، قوزئی قیبریس، قوزئی ماکدونیا و تورک دونیاسینین باشقا بؤلگهلریندن گلن قادین شاعیرلرله بیرلیکده اولماق منیم اوچون عادی بیر ادبیات بولوشماسیندان چوخ داها درین معنا داشییردی.
بو گؤروشمهیه هامیمیز موختلیف جغرافیالاردان گلمیشدیک؛ آنجاق شعریمیز، دیلیمیز و اورتاق کولتور کؤکلریمیز آرامیزداکی اوزاقلیقلاری آزالدیردی. من ده گۆنئی آذربایجانلی بیر شاعیر اولاراق، بو اورتاق کولتور جغرافیاسینین بیر پارچاسینین سسینی باکییا داشیماغا چالیشدیم. بو سس، ایللردیر دیل، ادبیات، کؤچ و دوغولوب بؤیودویوم تورپاقلارین خاطیرهلری آراسیندا شکیل آلماقدادیر.
بو سفرده منیم اوچون دگرلی اولان تَکجه شعر اوخوماق و یا دانیشیقلارا قولاق آسماق دئییلدی. تورک دونیاسینین قادین شاعیرلری و آیدینلاری ایله تانیش اولماق، یئنی دوستلوقلار و ادبی باغلار قورماق، بو علاقهلرین بولوشمادان سونرا دا داوام ائتمهسی اوچون یوللار آختارماق منیم اوچون چوخ دَگرلی ایدی.
بو گؤزل بولوشمانین گرچکلشمهسی اوچون اَمک وئرن دگرلی شاعیر و بؤیوک کولتور اینسانی سرحات کاباقلییا، خورامان مورادووایا و امگی کئچن هر کسه اورکدن تشکور ائدیرم. ائلهجه ده، بو گونلرده سئوگیلری، دوستلوقلاری و ایچدنلیکلری ایله باکینی منیم اوچون اونودولماز و گؤزل بیر خاطیرهیه چئویرن بوتون شاعیر و کولتور دوستلاریما تشکور ائدیرم.
باکیدان قاییتدیم؛ آنجاق اورهییمین بیر پارچاسی هله ده او شهرده قالدی. چونکو باکی منیم اوچون سادجه خریطهده بیر شهر دئییل. او، شعریمیزده، دیلیمیزده و اورتاق یادداشیمیزدا یاشاماغا داوام ائدن بؤیوک و گئنیش وطنین بیر پارچاسیدیر.
شعر بلکه جغرافی سرحدلری دَییشدیره بیلمز؛ آنجاق اینسانلار آراسیندا ائله بیر کؤرپو قورا بیلر کی، هئچ بیر سرحد او کؤرپودن کئچن کؤنول باغلارینی قوپارا بیلمز.
