کارون اینسان حاقلاری تشکیلاتینین یایدیغی سون معلوماتا گؤره، ایران ایله آمریکا و ایسرائیل آراسینداکی ۴۰ گونلوک ساواش و آردینجا باش توتان کوتلهوی توتوقلامالار سونوجوندا، اهوازین شیبان زیندانیندا ۶۰۰-دن چوخ سیاسی و عقیدتی محبوس آغیر شرایطده ساخلانیلیر.
کارون انسان حاقلاری تشکیلاتینین آچیقلاماسینا گؤره، حاضیردا شیبان حبسخانانین ۸-جی بندینده ۱۸۵ نفر، ۵-جی بندینده ۱۲۰ نفر و قرنطینه بؤلومونده ۳۱۰-دان چوخ اینسان ساخلانیلیر. ۲ مین نفرلیک ظرفیتی اولان اهواز (شیبان) زیندانیندا حاضیردا ۴ میندن چوخ دوسداغین اولماسی، بؤحرانلی شرایطین و آغیر حقوق پوزونتولارینین گؤستریجیسیدیر.
توتوقلانانلارین اؤنملی بؤلومو گنجلردیر
و توتوقلامالارین اغلبینین اهواز، فلاحیه (شادگان)، ایذج (ایذه)، بهبهان و مسجدسلیمان شهرلرینده آپاریلدیغی بیلدیریلیر. توتوقلانانلارین اکثریتی ۱۸ ایله ۲۵ یاش آراسی گنجلردیر. بو وضعیت گنج نسیلین گلهجگی و بؤلگهدهکی ایجتیماعی-امنیتی سونوجلار باخیمیندان درین قایغیلارا یول آچیب.
وکیلسیز و «اؤلوم قاضیسی» طرفیندن کؤتلهوی محاکمهلر؛
بیلگیلره گؤره، توتوقلانانلارین اکثرینده قانونی مودافعه و وکیل توتماق حوقوقو تاماماً اللریندن آلینیب. محاکمه جلسهلری زیندانین ایچینده، ویدئو-کنفرانس واسطهسیله و قروپ حالیندا (فلهای) کئچیریلیر.
محاکمهلرین بؤیوک بیر قیسمی، اهواز اینقیلاب محکمهسینین ۱-جی شعبه رئیسی و «اؤلوم قاضیسی» کیمی تانینان «احسان ادیبیمهر» طرفیندن آپاریلیر.
آغیر اتهاملار و بؤیوک جزالار؛
محبوسلارا «میلی امنیته قارشی اقدام»، «ایسرائیل و موساد-ا جاسوسلوق»، «نظامه قارشی تبلیغات» و «مخالیف قوروپلارا عوضولوک و یا علاقهده اولماق» کیمی آغیر اتهاملار وئریلیب. بعضی محبوسلار اوچون ۲۰ ایل ۱ گون، ۱۵ ایل ۱ گون، ۱۰ ایل ۱ گون، ۷ ایل ۱ گون و ۵ ایل ۱ گون حبس جزالاری صادر ائدیلیب. بو اتهاملارین و پروندهلرین هئچ بیر شفاف مدرکی یوخدور.
