بیر قوروپ تورک سیاسی و مدنی فعال، استاد و آیدین، یایینلادیقلاری بیلدیریده ایراندا تورکلره قارشی آرتان توتوقلامالار، آغیر حؤکملر و سیاسی، مدنی و کولتورل فعالیتلره گتیریلن محدودیتلرله باغلی ناراحاتلیقلارینی آچیقلاییبلار.
آراز نیوزون تبریز آراشدیرمالار مرکزیندن نقل ائتدیگینه گؤره، بیلدیریده سون بیر ایل ایچینده فرقلی استانلاردا اؤنملی سایدا آذربایجانلی فعالین توتوقلاندیغی یا حبس ائدیلدیگی، بیر قیسیمینین ایسه امنیت اتهاملاری و اوزون موددتلی حبس حؤکوملری ایله قارشیلاشدیغی بیلدیریلیب. امضا صاحیبلری همچنین بعضی متهملرین وکیل حاققیندان محروم ائدیلمهسینه، امنیت باسقیلارینا و محبوسلارین ساغلیق دورومونا اعتراض ائدیبلر.
آردی
بیلدیرییه گؤره، آراز امان، آیاز سیفخواه، آیت مهرعلیبیگلی (یوروش)، امین تقیزاده، باقر حاجیزاده، رضا سلیمی، سالار طاهر افشار، سیامک میرزایی، صمد حیدری، طاهر نقوی، عباس لسانی، عبدالعزیز عظیمی قدیم، عسگر اکبرزاده، علی بابائی، علی واثقی، فاطمه آتشی خیاوی، کرم مردانه، محمد ملکی، محمود اجاقلو، مرتضی پروین، ودود اسدی و یوسف کاری، بیلدیری حاضیرلاندیغی زامان حبسده اولان فعاللار آراسیندا یئر آلیبلار.
همچنین اونلارجا باشقا فعال وثیقه ایله آزادلیقدادیرلار، محکمه سورهجینین ایچیندهدیر یا حؤکملری قطعیلشدیگی اوچون اجرا مرحلهسینه یاخینلاشیر.
امضا صاحیبلری سوندا بیرلشمیش میللتلرین اؤزل راپورتورلارینا و حقیقتلری آراشدیرما هیئتینه، دؤولتلره و اولوسلاراراسی انسان حاقلاری قوروملارینا چاغیریش ائدیب؛ آذربایجانلی محبوسلارین دورومونو و محاکمه سورهجلرینی یاخیندان ایزلمهلرینی، عدالتلی یارغیلامانین، ساغلیق حاققینین و انسانی کرامتین قورونماسی اوچون آدیم آتمالارینی ایستهییبلر.
