آراز نیوز مئدیا گروهو:
«۸ مرداد زنگان گونو» بؤیوک آذربایجان جغرافیاسیندا بو کؤکلو شهرین تاریخی، مدنیتی و کیملیگینه نظر سالماق اوچون دگرلی بیر فورصتدیر.
افشار تورکلرینین اساس یئرلشیم یئرلریندن اولان و یوز ایللردیر افشارلار طرفیندن اداره اولان زنگان، قدیملردن بری تاریخی «آذربایجانین خمسه ولایتی»نین مرکزی اولوبدور. بوگونلرده ایسه «قیزیل آذربایجان» عونوانی ایله تانینان بو بؤلگه تاریخ بویو مستثنی مدنیتی ایله اؤنه چیخیبدیر.
آردی
بوگون زنگان تورک دیلینین ان اؤنملی قالالاریندان بیری ساییلیر؛ بیر شهر کی مدنیتی، عنعنهلری و تاریخی کیملیگی، اوجالی-انیشلی یوللارا باخمایاراق، هله ده اوجالیق و صلابتله اؤز یاشامینا داوام ائدیر. بو شهرین آذربایجانین کولتورل میراثینین قورونماسی و گلهجک نسیللره انتقالیندا بؤیوک سهمی اولوب و موختلف نسیللر اؤز دیل و عنعنهلرینی بؤلگهنین تاریخی کیملیگینین بیر پارچاسی کیمی قورویوب ساخلاییبلار. بو کولتورل میراثین ان پارلاق و اؤنملی جلوهلریندن بیری، «زنگان آشیق مکتبی»دیر کی اصیل و زنگین آشیقلیق صنعتینین ان اؤنملی، گؤزل و تمیز قوللاریندان ساییلیر. زنجان عاشیق مکتبی اؤزونه خاص اورژینال سبکی ایله یوزایللر بویو آذربایجان ائللرینین تاریخینی، مدنیتینی، حماسهلرینی، سئوگیسینی و حکمتینی ترنم ائدیب و همیشهلیک اولاراق تورک دونیاسینین شفاهی صنعتلری آراسیندا یوخاری بیر یئره صاحب اولوبدور.
زنگانین تاریخدهکی یئری ده تایسیزدیر. بو بؤلگهنین جنوب-شرقینده تاریخی «سلطانیه» شهری یئرلشیر؛ ائلخانلیلارین چیچکلنمه دؤورونده اسلام دونیاسینین ان بؤیوک سیاسی، علمی و مدنی مرکزلریندن بیری اولان بیر شهر. گونوموزده یونسکونین دونیا میراثی لیستینده قئید اولونان «سلطانیه گومبزی»، او قیزیل دؤورون معمارلیق شاه اثری کیمی دونیانین ان گؤزل و سئچیلن معمارلیق اثرلریندن بیری ساییلیر.
بو تورپاق ائلهجهده بیر چوخ متفکر و بؤیوک شخصیتلرین دوغولدوغو یئردیر. اونلارین ان سئچیلن و مشهورو بؤیوک فیلسوف و اشراق حکمتینین قوروجوسو «شیخ شهابالدین سهروردی»دیر کی اونون دوشونجهلری اسلام فلسفهسی و عرفانینا درین تاثیر بوراخیب و آدینی شرق تاریخینین ان بؤیوک دوشونورلری سیراسینا سالیبدیر.
تاریخی و مدنی کؤکلری ایله یاناشی، زنجان اؤز سنتی صنعتلری ایله ده دونیا مقیاسیندا شؤهرت قازانیبدیر. زنگانین مشهور «پیچاقچیلیق صنعتی» نسیلدن-نسیله کئچن و بوگون زنگان اوستالارینین باجاریغی، ظرافیتی و صنعتینین سمبولو اولان ان تانینمیش ال صنعتلریندن بیریدیر. بوندان علاوه، ملیلهچیلیک، چاریقچیلیق و میسچیلیک کیمی صنعتلر ده بو شهرین مدنی و ایقتیصادی کیملیگینین بیر حیصهسینی تشکیل ائدیرلر.
«زنگان گونو» آذربایجان تاریخی و مدنیتینین نه قدر زنگین و درین اولدوغونو ذهنلرده بیر داها جانلاندیریر. بیر شهر کی یوزایللر بویو هم سیاست و مدنیت ساحهسینده، هم دوشونجه و فلسفهده، هم ده تورک دیلی، موسیقیسی و صنعتینین قورونماسیندا تایسیز بیر نقش ایفا ائدیبدیر. زنگان هله ده آذربایجاندا تورک کولتورونون ان مؤحکم قالالاریندان بیری ساییلیر و اونون دگرلی میراثی، تاریخیمیز و مدنیتیمیزه اورک باغلایان هر کس اوچون اورتاق بیر سرمایهدیر.
زنگان گونو قوتلو اولسون
