İran Ticarət Palatasının üzvü Mürtəza Kuhnəvərd ABŞ-ın «Dəmir qapı» adlı yeni planının İranın xarici ticarətini yeni problemlərlə üz-üzə qoyacağı barədə xəbərdarlıq edib. Onun sözlərinə görə, quru yollarının məhdudlaşdırılması şimal və qərb gömrüklərinə təzyiqi 14 dəfəyədək artırır.
Kuhnəvərd «Eqtesadnews» saytına açıqlamasında bildirib ki, əvvəllər İranın ticarətinin 75 faizi cənub limanları vasitəsilə həyata keçirilirdi. Yüklərin digər sərhədlərə yönləndirilməsi hazırda infrastruktur üzərində ağır təzyiq yaradıb. Alternativ marşrutlar və dəmir yolu şəbəkəsi kifayət qədər tutuma malik deyil, Türkiyə marşrutu ilə bəzi malların daşınma xərci isə 3 dəfəyədək artıb.
Ticarət Palatasının üzvü əlavə edib ki, bu vəziyyət İranın istehsalını, ixracını, məşğulluğunu və valyuta gəlirlərini təhdid edə bilər.
