İsrail İranla bağlı missiyasını başa çatmış hesab etmir. Ölkənin müdafiə naziri İsrail Kats bazar günü, noyabrın 8-də İslam Respublikasını nüvə silahı əldə etmək cəhdlərini bərpa etmək istəməkdə ittiham edib.
Kats bu sözləri 1956-cı ildə Misirlə müharibədə həlak olmuş İsrail hərbçilərinin xatirəsinə həsr olunmuş anım mərasimində deyib. Onun sözlərinə görə, Tehran nüvə proqramından başqa, İsraili «real təhdidlə» üz-üzə qoyan digər təhlükəli addımlar da atır. Nazir İsrail cəmiyyətini təhlükəsizlik məsələlərində daxili fikir ayrılıqlarından yuxarı qalxmağa çağırıb.
İsrailin müdafiə naziri ölkə qüvvələrinin Qəzza, Livan və Suriyadakı təhlükəsizlik zonalarından çəkilməyəcəyini vurğulayıb. O, Hizbullahı xəbərdar edib ki, İranla müharibə yenidən başlayarsa və bu qruplaşma İsrailə hücumda İslam Respublikasına qoşularsa, «çox ağır zərbələr» alacaq.
