Əl-Ərəbiyyə telekanalı öz mənbələrinə istinadən iddia edib ki, Məsud Pezeşkiyan, Məhəmmədbaqir Qalibaf və Abbas Əraqçi İslam Respublikasının yüksək rütbəli hərbi rəsmilərinə ABŞ ilə danışıqların irəli aparılması üçün Qətərin təklifini qəbul etməyi tövsiyə ediblər.
Əl-Ərəbiyyənin mənbələrinə görə, bu çağırış Qətərin Tehran ilə Vaşinqton arasında yeni hərbi qarşıdurmanın başlanmasının qarşısını almaq üçün vasitəçilik səylərinin davam etdiyi bir vaxtda edilib.
Reuters agentliyinin əvvəlki məlumatlarına əsasən, Qətərin vasitəçiliyi ilə aparılan dolayı danışıqlar zamanı tərəflər müharibənin sona çatdırılması və Hörmüz boğazının yenidən açılması ilə bağlı təkliflər mübadiləsi aparıblar, lakin hələlik yekun razılaşma əldə olunmayıb.
Əl-Ərəbiyyənin bu üç rəsminin hərbi komandirlərə birgə tövsiyəsi barədə iddiası indiyədək müstəqil mənbələr tərəfindən təsdiqlənməyib, İslam Respublikasının hərbi qurumlarının bununla bağlı rəsmi mövqeyi isə məlum deyil.
