Al Arabiya telekanalı İslam Respublikası ilə ABŞ arasında danışıqlar üçün təklif olunan çərçivənin ilkin versiyasını əldə etdiyini xəbər verib. Sənəd yüksək dərəcədə zənginləşdirilmiş uran ehtiyatlarının taleyinin həll edilməsini və Hörmüz boğazının beynəlxalq gəmiçilik üçün açılmasını əhatə edir.
Al Arabiya telekanalının məlumatına görə, layihədə İranın zənginləşdirilmiş uran ehtiyatlarının üçüncü ölkəyə köçürülməsi və ya zənginləşdirmə səviyyəsinin azaldılması məsələsi nəzarət və yoxlama mexanizmləri barədə razılıq əldə olunması şərti ilə müzakirə ediləcək.
Plan həmçinin Hörmüz boğazının açılması ilə bağlı tənzimləmələrin ilkin anlaşma əldə olunduqdan sonra 7 gün ərzində nəzərdən keçirilməsini nəzərdə tutur.
Təklifə əsasən, Tehran və Vaşinqton gərginliyin azaldılması və gəmiçiliyin təhlükəsizliyinin təmin edilməsi məqsədilə qarşılıqlı etimad tədbirlərini mərhələli və gündəlik şəkildə həyata keçirəcək.
Sənəd hələ layihə mərhələsindədir və tərəflər arasında yekun razılaşma elan olunmayıb.
