İran İslam Respublikasının iki yüksək səviyyəli təhlükəsizlik rəsmisi açıqlayıb ki, Tehran Körfəzdə dənizin altından keçən rabitə kabellərinə hücum üçün dəqiq planlar hazırlayıb. ABŞ və İsraillə müharibə yenidən başlayarsa, belə bir addım region ölkələrinin internet bağlantılarını və iqtisadi fəaliyyətini poza bilər.
Araz News-un Reuters-ə istinadən verdiyi məlumata görə, rəsmilərdən biri xəbərdarlıq edib: «İran hücuma məruz qalarsa, artıq heç bir qırmızı xətt qalmayacaq; sualtı kabellərdən hərbi bazalara qədər.»
Reuters-in mənbələrinə görə, Tehran kabelləri sıradan çıxararsa, onların təmirinin də qarşısını almaq niyyətindədir; bununla rabitə pozuntusunun daha uzun müddət davam etməsi hədəflənir.
İslam İnqilabı Keşikçiləri Korpusunun (SEPAH) siyasi müavini Yədullah Cavani də daha əvvəl İran İslam Respublikasının Hörmüz boğazının altından keçən yeddi əsas internet kabelini hədəf ala biləcəyini deyərək hədələmişdi.
Ekspertlər xəbərdarlıq edirlər ki, belə hücumlar Körfəz ölkələrində internet, bank əməliyyatları və rəqəmsal xidmətlərin işini poza bilər; lakin bunun qlobal internetə təsirinin ehtimal ki, məhdud qalacağı qiymətləndirilir.
