Donald Trampın administrasiyası Ukraynanı xəbərdar edib ki, Rusiyanın neft emalı zavodlarına və digər enerji obyektlərinə uzaqmənzilli hücumlar davam edərsə, Kiyevlə kəşfiyyat əməkdaşlığı və silah təchizatının bəzi mexanizmləri dayandırıla bilər.
CNN-in məlumatına görə, iki Avropa rəsmisi bildirib ki, bu xəbərdarlıqlar Dövlət Departamenti və Pentaqon tərəfindən Ukrayna və Avropa rəsmilərinə çatdırılıb, hətta ABŞ ordusu bu məsələ ilə bağlı birbaşa Ukrayna komandirləri ilə əlaqə saxlayıb.
Bundan əvvəl "Financial Times" qəzeti də Vaşinqtonun kəşfiyyat məlumatlarının paylaşılmasını dayandırmağı və Ukraynanın Amerika silahları almaq imkanını məhdudlaşdırmağı təzyiq vasitəsi kimi gündəmə gətirdiyini yazmışdı. "Reuters" agentliyi bu məlumatı müstəqil şəkildə təsdiqləmədiyini bildirib, Ağ Ev isə hələ rəsmi mövqe açıqlamayıb.
