Tanınmış bir iqtisadçının hesablamalarına görə, ABŞ-da hər ailə bu il həmişə aldığı eyni mal və xidmətlər üçün orta hesabla təxminən 375 dollar artıq ödəyir. Ailə üzvlərindən heç biri bu texnologiyadan istifadə etməsə belə, bu artımın səbəbi süni intellektdir. Məsələnin kökü texnologiya nəhənglərinin 720 milyard dollar xərclədiyi data mərkəzlərindədir. Bu mərkəzlər hazırda çiplər, elektrik enerjisi və proqram təminatı uğrunda adi istehlakçılarla rəqabət aparır.
Süni intellekt serverləri çox böyük həcmdə yaddaş çipi işlədir. Bunlar smartfonlarda, noutbuklarda və oyun konsollarında istifadə olunan çiplərin eynisidir. Məhz bu səbəbdən həmin çiplərin qiyməti kəskin artıb. Nintendo ABŞ-da Switch 2-nin qiymətini 450 dollardan 500 dollara qaldırıb, Sony, Microsoft, Apple və Dell də öz məhsullarını bahalaşdırıb.
Data mərkəzləri həm də çox böyük həcmdə elektrik enerjisi sərf edir. Şəbəkənin məhdud gücündən pay almaq üçün digər abunəçilərlə rəqabət apardıqda elektrik enerjisinin tarifləri hamı üçün yüksəlir. ABŞ-ın şərq ştatlarından biri data mərkəzlərinin tələbatı ilə təzyiq altında qalan regional enerji şəbəkəsinə daxildir. Bu ştatda ailələrin aylıq orta elektrik enerjisi hesabı 2022-ci ildəki 122 dollardan bu il 181 dollara çatıb.
Proqram təminatı abunələrinin qiyməti də artıb. Duolingo, Microsoft Office və ABŞ-da populyar olan bir mühasibat proqramı süni intellekt funksiyalarını əlavə etdikləri vaxt qiymətlərini də qaldırıb.
Süni intellekt həvəskarları şəxsi «süni intellekt agentləri»ni işlətmək üçün Apple-ın kiçik kompüteri Mac Mini-dən istifadə ediblər. Bu proqramlar istifadəçinin əvəzinə işləri yerinə yetirir. Mac Mini-yə tələbat o qədər artıb ki, bu kompüter mağazalarda az tapılır. Apple da 599 dollarlıq ən ucuz modeli satışdan çıxarıb və hazırda ən ucuz Mac Mini-nin qiyməti 799 dollardır.
Süni intellekt tərəfdarları bu texnologiyanın sonda həyatı daha ucuz, işi isə daha məhsuldar edəcəyini bildirirlər. Bununla belə, yaddaş çiplərinin çatışmazlığının daha iki il davam edəcəyi proqnozlaşdırılır.
