Ukrayna Prezidenti Volodimir Zelenski Donald Tramp və Vladimir Putin arasında Rusiya dizel yanacağının tədarükü ilə bağlı elan olunan razılaşmaya münasibət bildirərək xəbərdarlıq edib ki, gərginliyin azaldılmasına təminat olmadan Moskvaya təzyiqlərin yumşaldılması müharibənin davam etməsinə və Rusiya hücumlarının güclənməsinə gətirib çıxaracaq.
Zelenski «sülhün heç vaxt zəiflik yolu ilə əldə olunmadığını» vurğulayaraq ABŞ-ı Rusiyaya qarşı sanksiyaları saxlamağa, Ukraynaya hərbi və müdafiə dəstəyini davam etdirməyə və Kremlə təzyiqi artırmağa çağırıb.
Ukrayna Prezidenti mesajında bildirib ki, gərginliyin azaldılmasına dair aydın və davamlı razılaşma əldə olunmadan Rusiyaya qarşı sanksiyaların hər hansı şəkildə yumşaldılması Moskvanın maraqlarına xidmət edən addım olacaq.
Zelenski Tramp və Putin arasında milyonlarla ton Rusiya dizel yanacağının ABŞ və dünya bazarlarına tədarükü ilə bağlı elan olunan razılaşmaya toxunaraq Rusiyaya iqtisadi təzyiqin azalmasının mümkün nəticələrindən narahatlığını ifadə edib.
O deyib ki, neft məhsullarının satışından əldə olunan gəlir Moskvaya müharibəni davam etdirmək üçün əlavə resurslar qazandıra bilər. Zelenski vurğulayıb ki, Rusiya neftinin və neft məhsullarının satışına icazə verilməsi münaqişənin uzanmasına səbəb olan amilə çevrilməməlidir.
Zelenski bununla bağlı deyib: «Putinə hədiyyə vermək nə sülh gətirir, nə də sivil dünyaya hər hansı fayda verir».
Zelenski həmçinin Avropanın bəzi rus oliqarxlarına qarşı sanksiyaları ləğv etmək barədə son qərarını tənqid edib və Moskvaya qarşı beynəlxalq təzyiqlərin saxlanılmasına çağırıb.
Ukrayna Prezidenti sonda Vaşinqtonun qətiyyətli mövqe tutmasının zəruriliyini vurğulayaraq deyib: «Biz ABŞ-ın Ukrayna xalqının həyatının müdafiəsinə dəstək verəcəyinə və ABŞ ilə Rusiya arasında güclü dialoqa ümid edirik; zəif deyil, güclü dialoqa».
