İsrailin milli təhlükəsizlik naziri İtamar Ben-Qvir oktyabrın 7-də, çərşənbə günü, 7 oktyabr hücumlarının üçüncü ildönümündə Fələstin Muxtariyyətinin ləğv edilməsini, onun təhlükəsizlik qurumlarının tərksilah olunmasını və qüvvələrinin həbs edilməsini tələb edib.
Ben-Qvir İordan çayının qərb sahilinin şimalında yerləşən Tulkərim şəhəri ətrafında olarkən İsrailin «eyni səhvi iki dəfə təkrarlamamalı» olduğunu deyib. O, İordan çayının qərb sahilindən 7 oktyabr hücumuna bənzər hücum həyata keçirilə biləcəyini iddia edərək Fələstin Muxtariyyətinə qarşı qabaqlayıcı tədbirlər görülməsini tələb edib.
Ben-Qvir belə bir tələbi ilk dəfə irəli sürmür. O, daha əvvəl müdafiə naziri vəzifəsini tutmaq üçün təqdim etdiyi proqramda da Fələstin təhlükəsizlik qüvvələrinin tərksilah edilməsini və Fələstin Muxtariyyəti rəhbərlərinin həbs olunmasını gündəmə gətirmişdi.
