The New York Times qəzetinin məlumatına görə, ABŞ həftəsonu 12 B-1 bombardmançısının hamısını qəfildən Cənubi İngiltərədəki Fairford bazasından çıxarıb. Bu qərardan əvvəl Vaşinqton SEPAH-ın planlaşdırdığı dron hücumu barədə yeni məlumatlar əldə etmişdi.
ABŞ və Britaniya rəsmiləri qəzetə bildiriblər ki, bu hücum mürəkkəb və çoxmərhələli planın bir hissəsi idi. Onların sözlərinə görə, planın məqsədi amerikan təyyarələrini vurmaq və bazada yerləşdirilmiş bir neçə yüz amerikalı hərbçidən bir qismini öldürmək idi.
Axios da ABŞ rəsmilərinə istinadən bombardmançıların çıxarılmasına səbəb kimi İslam Respublikasının mümkün dron hücumunu göstərib. The Wall Street Journal daha əvvəl bu bazaya hücum planı ilə bağlı təhlükəsizlik narahatlıqları barədə xəbər vermişdi.
ABŞ dövlət katibi Marko Rubio bazar ertəsi bu köçürməni Hərbi Hava Qüvvələrinin adi yerdəyişməsi adlandırmış və onun İran təhdidi ilə birbaşa əlaqəsini təkzib etmişdi. Bir neçə saat sonra Donald Tramp bombardmançıların İslam Respublikasının təhdidi səbəbindən Fairforddan çıxarıldığını təsdiqləyib.
