Şərqi Azərbaycan əyalətindəki Sufyan sement zavodunda baş verən qəza nəticəsində iki fəhlə həyatını itirib.
Şərqi Azərbaycan əyalət ostandarlığının böhran idarəetməsi baş müdiri Məcid Fərəşi bildirib ki, zavodda isti sement xammalı sızıb iki fəhlənin üzərinə tökülüb və nəticədə hər ikisi həlak olub.
Fərəşinin sözlərinə görə, xammal qapağının səhvən açılması isti maddələrin tökülməsinə və bu qəzanın baş verməsinə səbəb olub. Hadisə yerinə Şəhid Fəxrizadə yol xilasetmə bazasından və əyalətin sürətli reaksiya komandasından xilasedici qruplar da göndərilib.
İlkin məlumatlarda Sufyan sement zavodunda "partlayış" baş verdiyi bildirilmişdi, lakin Şərqi Azərbaycanın böhran idarəetməsi baş müdiri bu məlumatı dəqiqləşdirərək bildirib ki, hadisə isti xammalın tökülməsi nəticəsində baş verib və iki nəfərin ölümünə səbəb olub.
Sufyan sement zavodunda iki fəhlənin həlak olması İranda iş yerlərində təhlükəsizlik və yüksək riskli sənaye sahələri üzərində nəzarətlə bağlı ciddi çatışmazlıqları bir daha gündəmə gətirib. Bir əməliyyat xətası nəticəsində iki fəhlənin ölümü ilə nəticələnən bu hadisə rəhbərlərin hesabatlılığı və təhlükəsizlik standartlarının diqqətlə araşdırılması zərurətini bir daha artırır.
