ABŞ prezidenti Donald Tramp "Uoll-strit jornal" qəzetinə verdiyi bəyanatda ölkəsinin sursat ehtiyatlarının azalmasına dair yayılan hesabatları rədd edərək bildirib ki, Birləşmiş Ştatlar "istənilən digər ölkədən çox daha artıq" və "ehtiyacından artıq" sursat ehtiyatına malikdir.
Bu açıqlamalar Trampın Hörmüz boğazının yenidən açılmasına yönəlmiş diplomatik səylərin ortasında İrana qarşı hərbi əməliyyatların əhəmiyyətli dərəcədə genişləndirilməsini təxirə salması fonunda səslənir.
Bundan əvvəl bəzi kütləvi informasiya vasitələri məlumatlı ABŞ məmurlarına istinadən bu qərarın qəbulunda sursat ehtiyatlarının azalmasına dair narahatlığın rol oynadığını xəbər vermişdi.
"Uoll-strit jornal"ın məlumatına görə, ABŞ ordusu cümə günündən etibarən İrana qarşı iki həftəyə qədər davam edə biləcək yeni intensiv hücum dalğasına başlamağa hazır idi, lakin əməliyyat diplomatik danışıqlara daha çox vaxt verilməsi və geniş miqyaslı əməliyyatın Patriot zenit-raket sistemlərinin ehtiyatlarına və digər hava müdafiə sistemlərinə təsirinin qiymətləndirilməsi üçün təxirə salındı.
Həmin məmurlar vurğulayıb ki, vəziyyət dəyişkən olaraq qalır və prezident zərurət yarandıqda hücumların başlanılması barədə əmr verə bilər.
