Tehranı təmsil edən deputat Əmirhüseyn Sabiti bildirib ki, İranda beynəlxalq internetin kəsilməsi Milli Təhlükəsizlik Ali Şurasının göstərişi ilə və “müharibə şəraiti” səbəbilə həyata keçirilib və bu vəziyyət davam edir.

Araz News-un məlumatına görə, o qeyd edib ki, mövcud şərait hələ də qüvvədədir və hazırda beynəlxalq internetin yenidən qoşulması ilə bağlı heç bir plan yoxdur, məhdudiyyətlər davam edəcək.

Sabiti həmçinin Çinin təcrübəsinə istinad edərək bu ölkəni internet infrastrukturunun idarə olunması və inkişafında uğurlu model kimi təqdim edib və İranın da bu cür modellərdən istifadə edərək daxili şəbəkələri və yerli kommunikasiya infrastrukturunu gücləndirməsini təklif edib.

Daha əvvəl bir hökumət rəsmisi də “bəzilərinin İranda insanların beynəlxalq internetə ehtiyacı olmadığını düşündüyünü” demişdi.

Qeyd olunur ki, hakimiyyətə yaxın şəxslər, o cümlədən Milli Təhlükəsizlik Ali Şurasının üzvləri və deputatlar, o cümlədən Əmirhüseyn Sabiti filtrsiz internetdən istifadə edir.

Bu arada NetBlocks-un məlumatına görə, İran 64 gündən çoxdur ki, qlobal internetdən tam şəkildə ayrılıb. Bu qurum bu vəziyyəti dünyada rəqəmsal çıxışın ən sərt məhdudlaşdırılması hallarından biri kimi qiymətləndirir.

Eyni zamanda, filtrin aşılması üçün istifadə olunan vasitələrə, o cümlədən VPN-lərə və Starlink kimi peyk internetindən istifadə edənlərə qarşı təzyiqlərin artdığı bildirilir. Təhlükəsizlik qüvvələrinin yoxlamalar zamanı bu avadanlıqları aşkarlayıb müsadirə etdiyi qeyd olunur.

Bununla yanaşı, bu əməliyyatlardan birində bir Starlink istifadəçisinin öldürüldüyü barədə narahatedici məlumatlar yayılıb, lakin bu məlumat hələ müstəqil şəkildə təsdiqlənməyib.