ArazNews – Xüsusi: ArazNews radiosunun “Panorama” proqramının son buraxılışında ərəb əhvazi siyasi fəal və “İranda Millətlərin Demokratik Alyansı”nın dövri sözçüsü Uda Əfravi qonaq olub. Bu geniş müsahibədə ərəb millətinə qarşı sistemli ayrı-seçkilik, məzlum millətlərin birliyi və totalitar strukturların dağılması perspektivi müzakirə edilib.

▪️İşgəncə və sürgün hekayəsi; Qolestan xəstəxanasından Ərdəbil həbsxanasına

Ölkədən çıxmazdan əvvəl illərlə Əhvazdakı Qolestan xəstəxanasında psixologiya mütəxəssisi kimi çalışan Uda Əfravi təhlükəsizlik qurumları ilə qarşılaşmalarını bölüşüb. O, Quran dərsi keçdiyi bəhanəsi ilə həbs edildiyini, 6 ay işgəncəyə məruz qaldığını və Ərdəbil həbsxanasında 20 il sürgün cəzası aldığını bildirib.

Əfravi Ərdəbildəki həbs dövrünü Azərbaycan türklərini daha yaxından tanımaq fürsəti kimi qiymətləndirib və müxtəlif millətlərdən olan siyasi məhbuslar arasındakı həmrəyliyi dəyərli təcrübə adlandırıb.

▪️Əhvaz; yüz illik işğal və sistemli talan

Alyans sözçüsü Əhvazın hazırkı durumunu Rza şah dövründən başlayan bir əsrlik istismar siyasətinin nəticəsi kimi dəyərləndirib. O deyib: «Pəhləvi dövründən əvvəl Əhvaz yerli hakimiyyətə və inkişaf etmiş kənd təsərrüfatına malik idi, lakin neftin kəşfi və xarici müdaxilələrdən sonra fars-mərkəzli hakimiyyətlərin nəzarətinə keçdi.»

Əfravi rejimin ekoloji və iqtisadi siyasətlərini sərt tənqid edərək bildirib: «Rejim yalnız yeraltı sərvətləri talamır, həm də bataqlıqları qurudur, çayların suyunu fars bölgələrinə yönəldir və bölgənin ekosistemini məhv edir.»

▪️Demokratik Alyans; mərkəzçi İrandan ortaq coğrafiyaya keçid

Əfravi “İranda Millətlərin Demokratik Alyansı”nın məqsədlərini açıqlayaraq deyib: «İran vahid kimlik deyil, bir coğrafiyadır. Bu coğrafiya heç bir ailəyə və ya millətə məxsus deyil, burada yaşayan bütün millətlərindir.»

O, əsas hədəfin sekulyar, demokratik və qeyri-mərkəzləşdirilmiş sistem qurmaq olduğunu vurğulayıb və dəyişimin ölkə daxilində baş verməli olduğunu qeyd edib.

▪️Rza Pəhləviyə cavab: irqçi yanaşmanın gələcəyi yoxdur

Əfravi radikal millətçi mövqelərə və Rza Pəhləvinin açıqlamalarına reaksiya verərək deyib: «Bu fikirlər reallıqdan uzaq, irqçi və xəyali düşüncənin məhsuludur. Monarxiya tərəfdarları keçmişə qayıtmaq istəyir, amma millətlər artıq o dövrə qayıtmağa imkan verməyəcək.»

O bildirib ki, 35 milyondan çox əhalisi olan türk milləti və digər millətlər mərkəzçi faşizmin qarşısında əsas gücdür.

▪️Məzlum millətlərə birlik çağırışı

Sonda Əfravi müxtəlif siyasi qruplar arasındakı parçalanmanı tənqid edərək vahid siyasi platformanın yaradılmasının vacibliyini vurğulayıb. O deyib: «Bizə siyasi düşüncə və fəaliyyət sahəsində bir renessans lazımdır. Keçmiş düşüncə ilə davam etmək mümkün deyil; yalnız birlik və qarşılıqlı hüquqların tanınması ilə bu sistemi dəyişmək olar.»