Müharibəni bitirmək cəhdləri davam etdiyi bir vaxtda İran dövlət mediası ABŞ-ın 15 maddəlik planının rədd edildiyini və Tehranın yeni şərtlər irəli sürdüyünü bildirib.

ArazNews-un Press TV-yə istinadən verdiyi məlumata görə, yüksək səviyyəli siyasi-təhlükəsizlik rəsmisi İranın ABŞ təklifinə mənfi cavab verdiyini açıqlayıb və vurğulayıb ki, müharibə yalnız “Tehranın müəyyən etdiyi şərtlər” yerinə yetiriləcəyi halda başa çatacaq.

Məlumata əsasən, İran rejimi müharibənin bitməsi üçün beş şərt irəli sürüb: hücumların dayandırılması, müharibənin təkrar olunmayacağına zəmanət, təzminat ödənilməsi, bütün cəbhələrdə qarşıdurmanın sona çatması və Hörmüz boğazı üzərində İranın nəzarətinin tanınması. ABŞ-ın 15 maddəlik planının rəsmi detalları açıqlanmasa da, məlumatlara görə, bir aylıq atəşkəs, zənginləşdirmənin dayandırılması və nüvə güzəştləri qarşılığında sanksiyaların ləğvi təklif edilib.

Bu hadisələr Donald Trampın İrana sülh planı göndərildiyini bildirdiyi və münaqişənin sona çatacağına ümid etdiyini dediyi bir dövrdə baş verir, lakin Tehranın mövqeyi fikir ayrılıqlarının davam etdiyini göstərir.