Azərbaycanın baş naziri Əli Əsədov parlamentdə çıxışı zamanı İranla son gərginliyə toxunaraq İran dronlarının Naxçıvan Muxtar Respublikasının hava məkanına daxil olmasını “xoşagəlməz hadisə” adlandırıb. O bildirib ki, bu hadisə regionda təhlükəsizlik narahatlıqlarını artırıb.

ArazNews-un Yeni Müsavat-a istinadən verdiyi məlumata görə, Əsədov regiondakı son geosiyasi dəyişikliklərə diqqət çəkərək vurğulayıb ki, təhlükəsizlik risklərinin artdığı bir şəraitdə Azərbaycanın xarici siyasəti milli suverenliyin və sərhəd təhlükəsizliyinin qorunması prinsipi üzərində qurulub. Onun sözlərinə görə, Azərbaycan dövləti bu şəraitdə ölkənin təhlükəsizliyi və ərazi bütövlüyünün qorunmasına xüsusi önəm verir.

Baş nazir bildirib ki, son hadisələr bir daha göstərdi ki, İlham Əliyev xalqının təhlükəsizliyini prioritet hesab edən və xalqının yanında duran bir liderdir.

Əsədov çıxışında həmçinin Azərbaycanın quru sərhədlərinin bağlı qalması məsələsinə toxunaraq qeyd edib ki, regiondakı son hadisələr hökumətin quru sərhədlərini bağlı saxlaması qərarının “zəruri və təhlükəsizlik əsaslı” olduğunu göstərir.