Dövlət başçısı Donald Trampın administrasiyası İranla genişmiqyaslı hərbi qarşıdurma astanasına çatıb və bu müharibənin yaxın vaxtlarda başlama ehtimalı var. Hesabatda bildirilir ki, ABŞ-ın İrana qarşı mümkün əməliyyatı bir neçə həftə davam edən geniş kampaniya olacaq və daha çox tammiqyaslı müharibəyə bənzəyəcək.

ArazNews-un bu Amerika mediasına istinadən verdiyi məlumata görə, bu ssenari ABŞ və İsrail tərəfindən birgə həyata keçirilə bilər və miqyası əvvəlki məhdud əməliyyatlardan daha geniş ola bilər. Eyni zamanda tərəflər arasında nüvə danışıqları davam edir, lakin ABŞ rəsmiləri razılaşmanın əldə olunacağına nikbin yanaşmır və ciddi fikir ayrılıqlarının mövcud olduğunu bildirirlər.

Bu arada ABŞ regionda hərbi mövcudluğunu nəzərəçarpacaq dərəcədə artırıb; iki aviadaşıyıcının, onlarla döyüş gəmisinin, yüzlərlə qırıcının göndərilməsi və Yaxın Şərqə 150-dən çox hərbi avadanlıq daşıma uçuşunun həyata keçirilməsi yeni hərbi düzülüşün bir hissəsi kimi açıqlanıb.

Axios mənbələri bildirir ki, danışıqlar uğursuz olarsa, yaxın həftələrdə hərbi addım ehtimalı daha da arta bilər. Trampın bir müşaviri yaxın həftələrdə hərbi əməliyyat ehtimalını 90 faiz kimi qiymətləndirib.