ABŞ rəsmiləri Birləşmiş Ştatların İranın planlaşdırılan danışıqların məkanını və formatını dəyişdirmək tələbinə etiraz etdiyini və nəticədə, İstanbuldakı ləğvdən sonra Omanda keçirilməsi nəzərdə tutulan İran-ABŞ dialoqunun dayandırıldığını bildiriblər.

Araz News-un Axios nəşrinə istinadən verdiyi məlumata görə, iki ABŞ rəsmisi çərşənbə günü Vaşinqtonun Tehrana məkan və çərçivə dəyişikliyi tələbi ilə razılaşmayacağını bildirdiyini qeyd ediblər. Bu danışıqlar cümə günü İstanbulda, bəzi Yaxın Şərq ölkələrinin müşahidəçi qismində iştirakı ilə baş tutmalı idi.

Hesabata əsasən, İran danışıqların Omanda və ikitərəfli formatda keçirilməsini istəyib ki, müzakirələr yalnız nüvə mövzusuna fokuslansın və ABŞ ilə bəzi regional ölkələrin prioriteti olan raket proqramı kimi mövzular gündəliyə salınmasın. ABŞ rəsmiləri bu tələbi nəzərdən keçirdikdən sonra rədd ediblər.

Yüksək rütbəli bir ABŞ rəsmisi Axios-a müsahibəsində deyib: "İrana bildirildi ki, danışıqlar ya ilkin formatda keçiriləcək, ya da ümumiyyətlə heç bir danışıq olmayacaq." O əlavə edib ki, Tehran razılaşdırılmış çərçivəyə qayıdarsa, ABŞ bu həftə və ya gələn həftə danışıqları keçirməyə hazırdır.

Həmin rəsminin sözlərinə görə, bu dalan vəziyyətinin davam etməsi diplomatik yolu bağlaya və ABŞ hökumətinin masasındakı digər variantları gündəmə gətirə bilər.