یوسف کارینین یاخینلاری بیلدیریرلر کی، اردبیلین امنیت قۆوهلری اونو محکمده اشتراک ائتمهگه راضی سالا بیلمهدیکدن سونرا آناسی و قارداشینی سورغو-سؤال ائدرک تضییق آلتینا آلیبلار کی، یوسف کارینی محمکهیه گئتمهگه راضی سالسینلار.
آردی
عاییله یاخینلارینین وئردیگی معلوماتا گؤره، سون گۆنلر امنیت قۆوهلری تلفن زنگلری واسطهسیله دفعهلرله بو تورک میلّی فعالین عاییله عوضولرینی ههدهلهییبلر.
معلوماتا اساساً، اردبیل اطلاعات ایدارهسینین امکداشلاری تلفن تهدیدلری ایله ایستهدیکلری نتیجهنی الده ائده بیلمهدیکدن سونرا یوسف کارینین آناسی و قارداشینی نظارته آلتینا آلاراق سورغو-سؤال ائدیبلر.
یوسف کارینین عاییلهسی بو طلبی رد ائدرک بیلدیریب کی، اؤولادلاری اوین حبسخاناسی قارشیسیندا آجلیق آکسییاسی کئچیرن سیاسی محبوسلارین عاییلهلرینه دستک وئرمک مقصدیله اورادا اولوب و همین شخصلرین اوزون مدت حبسده ساخلانیلماسی اؤلکه قانونلارینا دا ضدّ دیر. اونلار همچنین وورغولاییبلار کی، مسئول قوروملار بو وضعیتی آرادان قالدیرماق عوضینه، عاییلهنی ده ساختا اتهام و پرونده حاضیرلاما پروسهسینه جلب ائتمهگه چالیشیرلار.
قید ائدک کی، داها اؤنجه تهرانین ائوین حبسخاناسیندا ساخلانیلان عباس لسانی و یوسف کاری، حبسخانا مودیریتینین تضییقلرینه باخمایاراق، تهران انقیلاب محکمسینین ۲۸-جی شعبهسیندن آلدیقلاری چاغیریش اساسیندا کئچیریلهجک محکمه اجلاسیندا اشتراک ائتمکدن امتیناع ائتمیشدیلر.
هر ایکی فعال بیلدیریبلر کی، “گؤستریشلی، قاپالی و عدالتسیز محکمەلرده” اشتراک ائتمهیهجکلر و عدالتلی محاکیمه پرینسیپلرینه ضد حساب ائتدیکلری بیر پروسهیه مشروعیت قازاندیرماغا حاضیر دئییللر.
