بۇگۆن، ۱۱ ژوئن، ۲۰-جی یۆزایلین آذربایجان میلی آزادلیق حرکتینین ان اؤنملی لیدئرلریندن بیری و گۆنئی آذربایجانداکی میلی حؤکۆمتینین باشچیسی میرجعفر پیشهورینین شۆبههلی اؤلۆمۆنۆن ۷۹-جۇ ایلدؤنۆمۆ آنیلیر.
۱۹۴۵-جی ایلده تبریزده قۇرۇلان و یالنیز بیر ایل وارلیغینی سۆردۆرهبیلن آذربایجان میلی حؤکۆمتی، قیسا عؤمرۆنه باخمایاراق آذربایجان دؤولتچیلیک تاریخینه قیزیل حرفلرله یازیلدی.
پیشهورینین لیدئرلیگینده دیل، کولتور، تحصیل، علم، اقتصاد و تورپاق اصلاحاتی ساحهلرینده تاریخی آددیملار آتیلدی. آنادیلینین رسمی دیل اعلان ائدیلمهسی، تبریز دؤولت اۆنیوئرسیتهسینین قۇرۇلماسی و میلی تئاترین آچیلماسی اوْنون سیاسی ایرادهسینین اؤنملی سوْنۇجلاری آراسیندا یئر آلدی.
میلی حؤکۆمتین پهلوی ایشغال نتیجهسینده ییخیلماسینین آردیندان قۇزئی آذربایجانا سیغینان پیشهوری، ۱۱ ژوئن ۱۹۴۷-جی ایلده یئولاخ یاخینلاریندا باش وئرن شۆبههلی بیر ترافیک قضاسیندا حیاتینی ایتیردی. چوخ ساییدا تاریخی قایناق و تانیق بۇ قضانین سوْوئت گیزلی ایستیخبارات تشکیلاتی طرفیندن پلانلانان بیر سۇقصد اولدوغونو اؤنه سۆرمکدهدیر.
باکیداکی فخری خیابانا دفن ائدیلن بؤیوک لیدئرین خاطیرهسی بۇگۆن هم قۇزئیده هم ده گۆنئی آذربایجاندا ساییغی و حؤمتله یاشادیلیر. اوْنون آزادلیق و عدالت قاوراملاری قونوسوندا دۆشۆنجهلری، بۇگۆن ده گونئی آذربایجاندا میلی حؤکومت قورولماسی اوچون موجادیله ائدن آذربایجان تورکلرینین تمل ایلکه و دایاقلاریندان گؤرۆلمکدهدیر.
