IranWire-ın xəbərinə görə, Qərbi Azərbaycan əyalətinin Şahindej şəhərində yaşayan 30 yaşlı Leyla Goli 13 abanda (4 noyabr) keçmiş əri tərəfindən qətlə yetirilib. Üç gün sonra bir çoban onun cansız bədənini şəhərdəki Vəhdət körpüsünün altında tapıb.
Leyla 10 yaşında ikən zorla özündən 13 yaş böyük bir kişiyə ərə verilmişdi. O, illərlə ərinin fiziki və psixoloji zorakılığına, eləcə də narkotik asılılığına dözüb və 16 yaşında ana olub. Ayrıldıqdan sonra iki övladı atalarının ailəsinin yanında qalıb, Leyla isə bir gözəllik salonunda dırnaq ustası kimi işləyərək dolanırdı.
IranWire-ın yazdığına görə, Leylanın keçmiş əri, xüsusilə boşanma tələbindən sonra, onu ölümlə hədələmişdi. Bu kişi əvvəlcə Leylanı boğmağa çalışıb, onun müqavimət göstərməsindən sonra isə bıçaqla boynuna və bədəninə zərbələr endirib. Daha sonra o, Leylanın cəsədini kisəyə qoyaraq körpünün altına atıb.
